نسمة الصباح

ياقمر في السما ماأحلي ضياه

يانسمة صباح برائحة العطـــور

ياربيع عمري عايــــش معــاه

أشرب من عيونك أرق الشعور

أبحر فـــي حبــك بلا مرساه

ضميني لقلبك بحب وسرور

أفرش طريقك بالورد وشذاه

وألون هواكي بعبق الزهــور

أنادي الطير فوق في سماه

يترنم باسمك ياأبهي نــور

في نظرة عيونك انسى الاه

في بسمة شفايفك تغرق بحور

في لمسة ايديكي الطب ودواه

يابلسم شافي سنين ودهور

جفن عيونك امل وحــــياه

وفي نن العين سحر مسحور

ياويل قلبي وتعبه وشقاه

تتعقد أمامه كل الامــــور

لو يمر اليوم من غير لقاه

تبكي عيوني ودمي يفور

في بعادك قلبي ....تاه

يانسمة صباحي برائحة العطور

اول فرز

خلصت الكليه وعملت اخلاء الطرف وأخدت اوراقي وملفي ..وقالوا لي يالله ياحلو علي الجيش...يابختك دا فرز اول وهتاخد

تأجيل ومعافاه من الجيش...رحت التعبئه وخلصت الورق وركبت الاتوبيس علي منظقة التجنيد وكنت لابس بأه آخر شياكه

بنطلون وقميص وجاكت وعمال اغني اسبقني ياقلبي اسبقني علي الجنه الحلوه اسبقني علي اساس اني

هاخد التاجيل وارجع تاني وأعيش عيشة الحريه...

دخلت منظقه التجنيد وكان زحام شديد من الشباب اللي هايتجند ...

سلمت اوراقي للمكتب المختص ووقفت انتظر عشان ينادوا عليه ويعطوني التأجيل..

ونادي المنادي .....المؤهلات يستنوا...والعاده(اللي ممعهمش شهادات) ييجوا يأخدوا التأجيل

يعني ياجماعه انا هاتجند؟ آه ياسيدي هاتتجند وهيسلموك المخله الوقتي..

ياجماعة الخير دول قالوا ان هناخد معافاه من الجيش...

مين قال ياخويا...احنا هنا اللي نقول مين يدخل ومين ياخد معفاه

يانهار مش باين ...طيب اعمل ايه دلوقت؟ دا البيت كله مستنيني أرجع ومعايا معافاه

المهم نادوا علينا ووقفنا طابور بالهدوم المدني ...ولقيت ضابط جاي يبص علينا ويلف ويدور حوالينا وشاور علي تقريبا

خمسه او سته وقال للصول اللي معاه خد اسماءهم...سألت الصول تاخد اسماءنا ليه؟ قال عشان هتتجندوا مظلات

مظلااااااااااااااااتاللي بينطوا من السما ببراشوت ..يانهاري دا أنا ببص من الدور العاشر عندنا أدوخ ..هروح مظلات؟

يعني مش كفايه هالبس واتجند وكمان مظلات...

وسرت وحدي شريدا...محطم الخطوات...لفيت جوه منظقه التجنيد لان ممنوع الخروج وأنا في حاله نفسيه سيئه جدا

وطبعا لاأكلت ولا شربت والليل دخل عليا وانا عمال امشي جوه المنطقه ...

لقيت واحد بينادي عليه (مجند) رحت له ..قالي تعالي اتبرع بالدم ..مالك ماشي سرحان ليه كده؟ حكيت له الحكايه

قالي ولا يهمك ادخل بس اتبرع وبعدين احلها لك..

نمت علي السرير وضرب الابره في دراعي وهات يادم مني وكان بينزل يغلي..المهم لقاني دايخ راح عطيني عصير وأكل

وقعدنا نتكلم مع بعض ..وصدق في وعده ونقلني من المظلات ...

تاني يوم جاني وقالي ياعم مبروك خلاص المظلات هاتروح المدرعات(الدبابات)

قلت ماشي اهو سلاح علي الارض احسن من سلاح في السما...

الكشف الطبي
----------------

وقفنا طابور نعمل كشف طبي وبدأ بالعيون ..وكان فيه عسكري بيحط قطره في العين الاول قبل الكشف عليها

فالمهم جه دوري وحط القطره من هنا وانا ماشفتش حاجه ..كان المفروض اروح ناحيه تانيه ولكن رجلي خدتني

علي نفس الطابور ..لقيت العسكري اخدني تاني وهياحط قطره ..قلت له ياعم انا اخدتها خلاص مصدقشي وراح

هب حاطط قطره تاني.....الدنيا سوده ليه كده ومين طفا النور؟ بقيت في بحر الظلمات ..خدوني وسحبوني علي

الدكتور..وطبعا الدكتور قعد يزعأ ويصرخ مين اللي عمل كده؟ وأنا طبعا مش شايف ولاعارف وأعصابي نيله

المهم خلصت الكشف الطبي كله واخدت الختم (لائق)

تسليم المخله(الملابس والادوات العسكريه)
--------------------------------------------

وقفنا برضه طابور واستلمنا المخالي ووقف العسكري ينادي واحنا نرد وراه

جوز فانلات...تمام.....نفتح المخله ونشوف الفانلات ونقول وراه ...تمام

معلقه وشوكه ..تمام..................................تمام

صندل وكاوتش ..تمام...............................تمام

بياده(الجزمه الميري) تمام ...

أنا طلعت البياده لقيت الفردتين شمال وواحده مقاس 46 والتانيه مقاس 40 والاتنين شمال

قلت له لا مش تمام انامعايه الاثنين شمال...قالي اسكت ياعسكري وابقي بدّل مع زميلك اللي اخد فردتين يمين

طيب وانا هالاقيه فين ده؟ ....اسكت ياعسكري.......تمام

خلص الجرد ودخلنا نغّير الملابس المدنيه بالملابس العسكريه

لقيت الافرول (البدله الميري) تاخدني ومعايا امي وبنت اختي مرتاحين واسعه جدا ..لبسنا وخرجنا ندي التمام

ورجعنا تاني عشان نلبس الهدوم المدني وننزل اجازه يومين نأيف فيهم البدله ونحلق وهكذا...

رجعت العنير عشان اغير هدومي لقيت البنطلون المدني بتاعي اتسرق..بنطلوني ياجماعه اتسرق ..حد شاف

البنطلون؟..طبعا لاحس ولاخبر...طيب الحل ايه؟ هسافر ازاي؟..قالوا خيط البنطلون ولمه علي قدك هو والجاكت وانزل

بيهم مؤقتا...وجابوا لي ابره وبكرة خيط...

مسكت الجاكت الميري وقلت هاايفه ازاي ده ؟ دا واسع جدا ..قالولي لمه كده ياأخي ..

قعدت الم في الجاكت كتير جدا وفي الاخر برضه واسع قوي قوي ومهرر عليه والبنطلون الميري برضه لميته كده من

الرجلين علي أد ماقدرت ولبست البنطلون وهو واسع جدا خصوصا من منطقه البطن ورحت حاطط الجاكت جواه

وكان منظري ولا الكرنبه فعلا أو البالون المتضخم جدا غير بأه تشمير الدراع بتاع الجاكت ..

نييجي بأه للبياده (الجزمه) لبست الفرده 40 في الشمال وكعبتها لان مستحيل تدخل رجلي انا بلبس 43 والفرده

التانيه لبستها يمين وكانت واسعه جدا ورجلي بتلؤ فيها(خدوا بالكم الفردتين شمال) والطاقيه كانت عامله ولا

الحله واسعه جدا علي دماغي.....

وخرجت ياساده من منطقه التجنيد بهذا المنظر..واول ماخرجت جاني شويه هوا طيروا الحله قصدي الطاقيه وطبعا مش

هاقدر اجري وراها ولا اجيبها ...هو انا عارف امشي؟ سيبتها تطير براحتها

ماشي بعرج خالص فكرني بأفلام شارلي شابلن القديمه ..غير انا نفسي شايل بطيخ وكرنب وكل ده ملفوف بالحزام

وماشي صعبانه عليه نفسي خالص ...وبيتهيأ لي كل الناس بتضحك علي منظري

وصلت المحطه وركبت عربيه بيجو وقلت للسواق انا هاركب باتنين جنبك..لان مستحيل حد يركب جنبي تاني علي وضعي

الصعب اللي أنا فيه...قعد السواق طبعا يضحك عليه ...وانا من غلبي قعدت اضحك معاه واهزر عشان انسي المأساه

دي..وقلبناها تهريج لغاية ماوصلنا بلدنا اترجيت السواق يوصلني لغاية البيت ...

دا أنا في بلدي ومعارفي كتير واللي يشوفني كده مش بعيد يبلغ عني مستشفي الخانكه ..

وصلت البيت بسلامه الله وطبعا بأه هم يضحك وهم يبكي ..

كانت ليله ولا الف ليله وليله من الضحك وخصوصا لما غيرت هدومي وشافوا الميري ومساحته الرهيبه

تاني يوم رحت للترزي وقلت طلع لي من الافرول ده خمس افرولات لو تقدر وايفهم حلو وعايزهم النهارده عشان مسافر

بكره ..

والدبايه فيها فتحه واحده يدخل منها أربعه وفتحة السواق

وكان التدريب ان لازم بأقصي سرعه ندخل احنا الاربعه من الفتحه دي

تخيلوا بأه المنظر لما يقول المُعلم اركاااااااااااااااااااااااااااااااااااب

تلاقينا احنا الاربعه فوق بعض بندخل

دا يضرب دماغ ده ....وده يدوس علي ايد ده ..لان اللي يتأخر ياخد جزاء

غير كده تسمعوا بأه زييييييييييييييييييييييييييييييئ ...البنطايل اتقطعت

كل يوم بعد التدريب نجيب الابره والخيط ونقعد نخيط البناطيل المقطوعه

أول مره احلق لنفسي شعري....أول مره تجبرني الظروف اني اطبخ ...أول مره اسوق عربيه

أول مره تحب ياقلبي....وهكذا

وموضوع الحلاقه والحلاقين دا متعب قوي قوي بالنسبه لي لانه دائما الحلاقين زحمه جدا وعمري

مارحت للحلاق ولقيته فاضي مثلا او عنده زبون او اتنين ..لالا المحل دائما مليان زباين ...

وبعدين عنده مجله وجرنان اليوم والباقي كله قديم يعني اقعد ساعات الانتظار في قراءه المجلات

القديمه ...

زي الانسه ام كلثوم ستحيي حفل بأغنيه اراك عصي الدمع

العندليب عبد الوهاب يحضر افتتاح فيلم الورده البيضا في سينما الكورسال

الزحام لايطاق حيث وصل عدد الاتمبيلات(السيارات) في مصر(القاهره) 100 أتومبيل

وصل سعر الشاي الي واحد قرش صاغ

الكاتب طه حسين يمتدح فاتن حمامه علي قوة تمثيلها لفيلم دعاء الكروان..

وهكذا ..أخبار مش بايته وبس لا دي حامضه قوي..

ولما ييجي دوري في الحلاقه بعد ساعات الانتظار دي كلها ألاقي الحلاق بقه في ودني وهات يارغي

ورغي سمعته الف مره يعني ممل جدا وصداع علي الفاضي...

وساعات أزهق من الانتظار وامشي وانا ماحلقتش ...وأسمع بأه تعليقات البيت والشغل

كل اللي يشوفني يقولي مش هاتحلق ..مش هاتحلق..لما ازهق ..

المهم قررت بيني وبين نفسي ان احلق لنفسي هو الحلاق يعني بيعمل ايه؟

المكنه معاه وبيمشي بيها علي راس الزبون علي الدرجه المطلوبه ووتطلع الحلاقه تمام

رحت المحل واشتريت مكنه الماني اخر حلاوه ومنظرها يفرح القلب ...وفي آخر مره كنت

بحلق فيها راقبت الحلاق وهو بيحلق للزباين وماشية ايديه علي راس الزبون ولما جاء دوري

أقعدت اسأله شوية اسئله عشان افهم الموضوع كويس....

وعندما طال شعري وطلب الحلاقه استعديت للمهمه بكل حماس

حطيت الدرجه اللي الحلاق بيحلق لي عليها وشغلت المكنه وحطيتها علي راسي ودعيت

للالمان العباقره والمخ الالماني الجبار..ياسلالالالالالالالام اختراع رهيب

والاقي المكنه جريت علي راسي ولا سباق الماراثون ..مفيش دقيقه ووقفتها لانتظر النتيجه

ياللهول...دا مين ده اللي في المرايا ..أكيد مش أنا

لقيت راسي ولا شبه جزيرة سيناء ..سهول وهضاب ...ومستنقعات...وجبال

قلت ياواد امشي بالمكنه مشيه تانيه تظبط المسائل وتسوي الاراضي الوعره دي .........

فتحت المكنه ومشيت علي راسي مره اخري

منظر راسي زاد كلاكيع وحارات وشوارع وكلها مطبات وحفر ....يادي المشكله ...مش عايزه

تتظبط ليه بس؟ مش عارف

طيب الحل ايه؟..مش ممكن هاخرج ودماغي عامله كده...آه البس طاقيه واروح للحلاق

لبست طاقيه وفي جنح الظلام تسللت الي محل الحلاقه راجيا مستعطفا اياه ان ينظر الي

رأسنا الكريمه بعد المعركه الحربيه التي تمت عليها..

الحلاق بص لدماغي وكان هايغمي عليه من الخضه

...ايه ده؟ مين اللي عمل فيك كده؟

...أنا

...حلقت لنفسك

...آه..ليه؟

...كويس ان ودانك ماتقطعتش وعينيك باظت...يابني انت كنت بتحلق ولا بتعزق في ارض زراعيه وتحرثها

...الحل أيه الله يخليك

...زلبطه

...أقرع خالص ..مش ممكن طبعا

...شوف حلاق غيري يمكن يعمل معجزه ويطلع الشعر ويسويه تاني

...يهديك يرضيك ياحاج شوف حل غير الزلبطه دي

...يابني كويس انك سليم ومجرحتش نفسك

...

...لازم تدرب ايدك علي ماسكة المكنه وتبدأ ازاي وتنتهي ازاي ..هي لعبه ياحبيبي

...يعني اشتغل عندك الاول وبعدين احلق لنفسي

...طيب يافالح يانبيه عملت ايه من نفسك وعلمت نفسك ازاي ..دا انت راسك ولا رأس الرجاء الصالح

ماطولش عليكم...

حلقت زلبطه خالصوخرجت من عنده اعطس من البرد وماشي العن في المكنه الالماني

والاختراعات الالمانيه...

طبعا في البيت أول ماشافوني كله قعد يضحك ضحك هستيري بدون انقطاع

ولما جيت استحمي بعد المعركه دي حسيت ان الميه نازله علي سطح صفيح وقنابل بترخ عليه

يااااااااااه كل ده بسبب الشعر..

وفي العمل تاني يوم لم يمر اليوم بسلام

طبعا رحت لابس اخر شياكه مع الطاقيهوكلهم مستغربين منها لان عمري مالبست

طاقيه...وطبعا لما وريتهم رأسنا الكريمه وماحدث لها ..لا تتخيلوا كميه الضحك وأنا مذهول ومزهبل علي

عيني...وتوووووووووبه